អង់គ្លេស៖ អ្នកចាំទីក្រុមជម្រើសជាតិកូស្តារីកា Keylor Navas បានផ្ទេរទៅកាន់ក្លិប Nottingham Forest នៃក្របខណ្ឌ Premier League ក្នុងលក្ខខណ្ឌខ្ចីជើងពីក្លិបនៃលីគកំពូលបារាំង Paris St Germain។ នេះបើតាមការបញ្ជាក់ពីក្លិប Nottingham Forest ជាផ្លូវការនៃថ្ងៃចុងក្រោយមុនការបិទទីផ្សារដោះដូរកីឡាករនៃទ្វីបអឺរ៉ុប។
អ្នកចាំទី Keylor Navas ដែលធ្លាប់ឈ្នះពាន Champions League ៣លើកជាមួយក្លិប Real Madrid បានផ្ទេរមកកាន់ក្លិប Nottingham Forest រហូតដល់ចប់រដូវកាល ២០២២/២០២៣នេះ។
Navas ធ្លាប់បានឈ្នះពានអ្នកចាំទីល្អបំផុតប្រចាំរដូវកាល ២០១៧/២០១៨ នៃក្របខណ្ឌ UEFA Champions League និងឈ្នះពាននានាសរុបចំនួន ១២ពានជាមួយ Real Madrid មុននឹងផ្លាស់ទៅកាន់ PSG នៅឆ្នាំ២០១៩ និងឈ្នះពានលីគកំពូលបារាំង Ligue1 ២លើក។ យ៉ាងណាមិញ Navas ហាក់ខកខានឱកាសបង្ហាញខ្លួនជាមួយ PSG ក្រោយពេលក្លិបអ្នកមានបារាំងមួយនេះបានចុះហត្ថលេខានាំយកអ្នកចាំទីជម្រើសជាតិអ៉ីតាលី Gianluigi Donnarumma។
នៅទីផ្សារដោះដូរកីឡាករខែមករានេះ ក្រៅពី Navas ក្លិប Nottingham Forest បាននាំយកកីឡាករ២នាក់ផ្សេងទៀតរួមមាន ខ្សែបម្រើ Jonjo Shelvey ពីក្លិប Newcastle United និងខ្សែការពារ Felipe ពី Atletico Madrid។ បច្ចុប្បន្ន Nottingham Forest កំពុងឈរនៅចំណាត់ថ្នាក់លេខ ១៣ នៃក្របខណ្ឌ Premier League អង់គ្លេស ក្រោយឆ្លងកាត់២០ប្រកួត មាន២១ពិន្ទុក្នុងដៃ៕
